BUTUAN CITY – Ang Department of Social Welfare and Development (DSWD)-Caraga buot magpahibalo nga sa 2018 ug sa mga nanglabay’ng katuigan, and pundo alang sa Pantawid Pamilyang Pilipino Program kon 4Ps gikwenta base sa 90% compliance rate – o subay sa bana-bana nga 90% sa mga benepisyaryo makatuman sa mga kondisyones nga gikinahanglan sa Programa.

Sa tuig 2017 ug 2018, ang compliance rate misaka gikan sa 90% ngadto sa 95% hinungdan nga mikulang ang pundo tungod sa giingong 5% nga pagsaka. Nakita nga ang paghatag og dugang rice assistance o subsidy nahimong nakapa-engganyo sa mga benepisyaryo nga mas tumanon ang pa ang pagsunod sa mga mando sa Programa sama sa pagtambong sa Family Development Sessions, pagsulod sa klase, ug pagbisita sa mga health centers.

Sigon ni OIC-Regional Director Mita Chuchi Lim, “Nagpadayon ang pagpaningkamot sa DSWD nga madugangan ang pundo sa 4Ps alang sa atong mga benepisyaryo. Masaligon kita nga hingpit ang atong pagpanghatag sa mga ayuda.”

Aron mataplan ang dugang pundo nga gikinahanglan sa programa, ang Buhatan nangayo’g dugang nga pundo sa Department of Budget and Management kon DBM. Dugang pa ni Director Lim nga malaumon ang Buhatan nga masabtan sa mga benepisyaryo ang maong hisgutanan. ###(JOANA RICA P. MILLAMA/Social Marketing Unit/DSWD Field Office Caraga)