Gisugdan karong adlawa ang pag apud-apud sa tabang pinansyal sulod sa Ayuda sa Kapos ang Kita Program (AKAP) ngadto sa mga kwalipikado nga mga benepisyaryo sa pito (7) ka mga payout venues diri sa rehiyon sa Caraga.

Ang AKAP, usa sa mga bag-o nga programa sa Department of Social Welfare and Development (DSWD), kung asa, ang mga indibidwal nga makonsidera nga mga “near poor” makadawat ug assistance gikan sa buhatan.

Ang mga near poor mao ang mga low income minimum wage earners, o mga indibidwal nga adunay trabaho apan ang kita dili mo lapas sa minimum wage nga gitakda sa Regional Tripartite Wage and Productivity Board (RTWPB).

Karong adlawa, Mayo 18, 2024, ang DSWD Field Office Caraga nakapahigayon sa simultaneous payouts sa mga lugar sa Butuan City (Agusan National High School – para sa mga lumulupyo sa Butuan City; Agusan del Norte Gym – para sa mga lumulupyo sa Carmen, Nasipit, ug Buenavista, ADN), Surigao City, Socorro, Surigao del Norte, Tandag City, Bislig City, ug sa San Jose, Province of Dinagat Islands.