Nagpahinumdom si Department of Social Welfare and Development (DSWD) Secretary Rex Gatchalian sa tanan nga mga benepisyaryo sa mga programa sa buhatan nga wala’y si-kinsa ang makahilabot sa dawaton nga ayuda nga gikan sa gobyerno.

Kini ang pahayag ni Sec. Gatchalian sa lokal ug nasyonal nga mga medya niadtong Hunyo 20, 2024 sa gisalmutan niini nga Presidential Assistance to Farmers, Fisherfolk, and Families payout sa Tandag City, Surigao Del Sur.

Giklaro ni Sec. Gatchalian nga ang buhatan sa DSWD doble ang pagkugi sa paghatag sa sakto nga impormasyon. Mao nga importante sa ahensya nga mapahibalo ang katawhan sa ilang katungod aron dili mahitabo ang susama sa nahitabo sa PAFFF payout didto sa Davao del Sur sa niaging mga semana. Kay matod pa ni Sec. Gatchalian nga “walay mangingilad kung walay magpa-ilad.”

Dugang pa ni Sec. Gatchalian, ang ayuda nga madawat sa indibidwal o pamilya nga gikan sa buhatan sa DSWD, gikan kini sa Gobyerno ug kung kini nadawat na sa benepisyaryo, dili kini pwede kaltasan o kuhaon sa maski kinsa.

Kung duna man gani kuno manghilabot sa nadawat nga ayuda, mamahimo kini nga isumbong sa pinaka-duol nga opisina (Satellite Office) sa Rehiyonal nga buhatan sa DSWD aron ma-aksyonan dayon sa mga personahe sa DSWD.